«Kakasuwhojalyk» önümçilik dolanyşygynyň binasynda «Ýaşlar — röwşen geljegimiz» ady bilen wagyz-nesihat duşuşygy geçirildi. 2023-nji ýylyň «Arkadag Serdarly bagtyýar ýaşlar ýyly» diýlip yglan edilmegi mynasybetli geçirilen duşuşyga agzalan kärhanada zähmet çekýän işçi-hünärmenler gatnaşdy.

Türkmenistanyň Kärdeşler arkalaşyklarynyň Kaka etrap birleşmesi, Türkmenistanyň Magtymguly adyndaky Ýaşlar guramasynyň etrap Geňeşi tarapyndan guralan duşuşykda çykyş edenler gadam basylan ýylyň «Arkadag Serdarly bagtyýar ýaşlar ýyly» şygary astynda geçmeginiň özlerinde uly ruhubelentlik döredýändigini, şanly ýylyň guwandyryjy üstünliklere beslenmegi ugrunda yhlasly zähmet çekjekdiklerini guwanç bilen nygtadylar.

Turuwbaşdan işjeňlige eýe bolan duşuşyga gatnaşyjylar Watanymyzyň ösüşiniň täze tapgyrynda ýaşlara bildirilýän beýik ynam we olar hakda edilýän aladalar üçin Gahryman Arkadagymyzyň we döwlet Baştutanymyzyň adyna çäksiz alkyşlaryny beýan etdiler.