Gurakçylyk sebäpli Ispaniýanyň Sewilýa şäherinde suw sarp etmek boýunça çäklendirme girizildi. Şoňa laýyklykda, sebitiň ýaşaýjylary esasy zerurlyklardan başga zatlar üçin suw ulansalar jerime tölemeli bolarlar. Bu barada Sewilýa şäher häkimligine degişli bolan suw dolandyryş kompaniýasy «Emasesa» habar berdi.

«Emasesa» kompaniýasy ýakyn wagtda jemgyýetdäki ähli ýaşaýjylar we edaralar üçin aşa köp suw ulanmak bilen baglanyşykly belli bir möçberdäki jerimeleriň kesgitlenjekdigi aýtdy. Şeýle hem, Sewilýa şäher häkimligi - awtoulag ýuwmak, bagy suwarmak, howuz doldurmak ýaly esasy zerurlyk hasaplanmaýan zatlary gadagan edýär. Gündelik suw sarp etmegiň möçberi bolsa adam başyna 90 litr diýlip kesgitlenildi.

Belläp geçsek, Ispaniýa soňky 30 ýyl bäri gurakçylyk bilen göreşýär. Ýurduň çägindäki derýalarda we köllerde suwuň derejesi 28,5 göterim peseldi. Dowam edýän gurakçylyk oba-hojalygyna hem ýaramaz täsir edýär. Häzirki wagtda hökümet bu ýagdaýdan nädip baş alyp çykmagyň aladasyny edýär.