ABŞ-da ýerleşýän «Microsoft» - şereketi golaýda «Internet Explorer» programmasyny geljek ýyl ulanyşdan aýyrjakdygyny mälim etdi. Häzirki wagtda «Internet Explorer» programmasyna ençeme wagtdan bäri täzelenme gelmeýär. Gözleg programmasynyň iň soňky ulanyljak senesiniň 2023-nji ýylyň 14-nji fewraly boljakdygy mälim edildi.

Mundan birnäçe wagt öň «Microsoft» şereketi ähli «Windows 10» platformalaryndan «Internet Explorer» programmasynyň aýryljakdygyny mälim edipdi. Şeýle habary eşidip eýýäm dünýäniň müňlerçe «Internet Explorer» ulanyjylary programmadan ýüz öwürdiler.

Şeýle-de bolsa, käbir edaralaryň we guramalaryň infrastruktura sebäpli «Internet Explorer»-den peýdalanýandygy mälimdir. «Microsoft» bu edaralara we guramalara iş prosesinde hiç hili päsgelçilik döretmezden, infrastrukturany täzelemekligi duýduryş berdi. Sebäbi 2023-nji ýylyň fewral aýynyň ahyryndan eýýäm «Internet Explorer» gurnalan kompýuterlerdäki gözleýji ýok ediler.

Ilkinji gezek 1995-nji ýylyň 16-njy awgustynda «Windows 95» üçin çykan «Internet Explorer» şol döwürde gaty meşhurdy. Şeýle-de bolsa, köp ýyllaryň dowamynda has köp aýratynlyk hödürlän «Google Chrome», «Mozilla Firefox» we «Brave» ýaly programma üpjünçilikleri öňe çykdy. 

Batyr MÄMMEDOW,

Türkmen döwlet binagärlik-gurluşyk
institutynyň mugallymy.