Hormatly Prezidentimiziň parasatly ýolbaşçylygynda her bir gelýän täze ýyla ýagşy arzuw niýetler bilen gadam basylýar. Ýetip gelýän täze 2022-nji ýyly hem mynasyp garşylamak maksady bilen ýurdumyzyň ähli künjeklerinde şol sanda Babadaýhan etrabynyň çäginde hem Täze ýyl baýramy mynasybetli geçiriljek baýramçylyk dabaralaryna ýokary derejede taýýarlyk işleri görülýär.

         Ýurdumyzyň obadyr şäherlerinde baýramçylyk bezegleri bilen bezelen Täze ýyl arçalarynyň oturdulmagy ýaşulydyr ýaşkiçileriň baýramçylyk begenjibi has-da artdyrýar.Baýramçylyk keşbine beslenen ýurdumyzyň bazarlarynda hem-de söwda nokatlarynda ýurdumyzda ösdürilip ýetişdirilen gök-bakja önümleriniň, miweleriň dürli görnüşleriniň, türkmen telekeçilerimiz tarapyndan öndürilen halkyň isleg bildirýän ýokary hilli harytlarynyň beýleki görnüşleriniň ählisiniň elýeter bahalardan bolçulygynyň döredilmegi hem aýratyn buýsandyryjydyr.

       Täze ýyl baýramçylygyna bagyşlanyp Babadaýhan etrabynyň medeniýet öýünde etrabymyzyň dürli edara-karhanalarynda zähmet çekýän watandaşlarymyzyň gatnaşmaklarynda ,,Hoş geldiň Täze ýyl, Berkarar Watana” atly şygar bilen guralan baýramçylyk dabarasy hem dabara gatnaşyjylaryň baýramçylyk şatlygyny has-da artdyrdy.

        Baýramçylyk dabarasy etrap häkimligi, etrap medeniýet bölümi hem-de etrabyň jemgyýetçilik guramalarynyň bilelikde guramagynda geçirilip, dabarada etrabyň medeniýet we sungat ussatlarynyň ýerine ýetiren  Berkarar döwletimiziň bagtyýarlyk döwrüni, ýurdumyzyň ösüşlerini wasp edýän aýdymdyr-sazlary şeýle-de ýerine ýetirilen degişme sahnalar dabara gatnaşyjylara ruhy lezzet paýlady.  

        Dabaranyň dowamynda oňa gatnaşyjylar halkymyzy täze üstünliklere ruhlandyrjak täze 2022-nji ,,Halkyň Arkadagly zamanasy” ýylymyzyň ýurdumyza üstünlik getirjek ýyllaryň biri bolmagyny arzuw etdiler.

        Hormatly Prezidentimiziň parasatly ýolbaşçylygynda gülläp ösýan ýurdumyzda  ýagşy arzuw-niýetler bilen garşylanjak täze 2022-nji ýylymyz Eziz Watanymyza, agzybir türkmen halkymyza rysgal döwlet getirsin.