Hindistanda «Yşyk baýramy» diýlip hem atlandyrylýan «Diwali festiwaly» geçirilýär. Bu festiwal Hindistanda iň möhüm festiwallaryň biridir.  Festiwalda köçeler dürli reňkli yşyklar bilen yşyklandyrylýar.

Hindistan soňky iki ýyl bäri bu baýramçylygy epidemiýa sebäpli belläp bilmedi. Bu ýyl bolsa ýurduň millionlarça raýatlary «Diwali festiwaly» üçin öýlerini we iş ýerlerini bezemek üçin bazarlara şeýle-de söwda merkezlerine ýykgyn etdiler.

Adatça, «Diwali festiwaly» ýurtda hasyl möwsüminiň gutarmagyny alamatlandyrýar. Gadymdan gelýän däp-dessura laýyklykda hindiler baýramçylyk günlerinde ýamanlyklardan dynmak niýeti bilen bedenini ajy burç, künji ýa-da kokos ýagy bilen ýuwýarlar. Ýary gije bolsa ýagşylygyň üstün çykmagy üçin asmana dürli reňkli feýerwerkleri we uçgunjyklary atýarlar.

Hindiler bu baýramçylyga birnäçe hepde öňünden taýynlyk görýärler. Baýramçylyk döwründe maşgalalar birek-biregiňkä myhmançylyga barýarlar. «Diwali festiwaly» diňe bir Hindistanda däl eýsem-de Malaýziýa, Nepal, Şri-Lanka, Mýanma, Gaýana, Singapur we Fiji ýaly ýurtlarda hem bellenilýär. 

Toýly GYLYÇMERGENOW,

Türkmen döwlet binagärlik-gurluşyk
institutynyň talyby.