12-nji awgustda, “Awaza” milli syýahatçylyk zolagynda. Halkara Hazar deňziniň gününe bagyşlanylyp, «Hazar – Dostluk we ylalaşyk deňzi» atly ylmy-amaly maslahat geçirildi. Maslahat, Türkmenistanyň Prezidentiniň tabşyrygy boýunça Daşary işler ministrliginiň goldaw bermeginde Oba hojalyk we daşky gurşawy goramak ministrligi tarapyndan guraldy.

Ylmy-amaly maslahata, ýurdumyzyň ugurdaş ministrlikleriniň we pudaklaýyn dolandyryş edaralarynyň ýolbaşçylarydyr hünärmenleri, alymlar, şeýle-de Hazarýaka döwletleriň Türkmenistandaky ilçihanalarynyň, iri halkara guramalaryň — BMG-niň Hemişelik utgaşdyryjysynyň ýurdumyzdaky edarasynyň, BMG-niň Ösüş maksatnamasynyň, Ýewropada Howpsuzlyk we Hyzmatdaşlyk Guramasynyň, Ýewropa Bileleşiginiň wekilleri gatnaşdylar.

Çärede, Hazar deňiz gurşawyny goramagyň esasy meseleleri, Hazar ýurtlarynyň arasynda dürli ugurlar boýunça hyzmatdaşlygy ösdürmegiň geljekki meýilnamalary we täze sebit taslamalaryny durmuşa geçirmegiň geljegi ara alnyp maslahatlaşyldy.