Aşgabat şäheriniň günbatar künjeginde ýerleşýän Gurtly ýaşaýyş toplumynyň gurluşyk işleri tamamlanyp barýar. Toplum 90 gektardan gowrak meýdany tutup, bu ýerde dört gatly ýaşaýyş jaýlarynyň birnäçesi guruldy.

Häzirki wagtda binalarda timarlaýyş işleri tamamlanyp, awtoulag ýollary asfaltlanýar, toplumyň içinde we jaýlaryň arasynda ulag we pyýada ýollary çekilýär. Ýakyn wagtda, Türkmenistanyň Senagatçylar we telekeçiler birleşmesiniň agzalary 64 sany dört gatly ýaşaýyş jaýynyň gurluşygyny tamamlarlar.

Gurtly ýaşaýyş toplumynyň gurluşygynyň ikinji tapgyrynda 3 müňden gowrak maşgala täze öýlere göçüp gelerler. Öýler 150 inedördül metrlik dört otagly, 120 inedördül metr meýdany bolan üç otagly we meýdany 88 inedördül metr bolan iki otagly öýlerden ybaratdyr. Toplumyň çäginde birnäçe söwda nokatlary, söwda we dynç alyş merkezi, bazar, durmuş üçin hyzmat desgalary, mekdep we çagalar baglary bar.