Ak bugdaý etrabyndaky ýöriteleşdirilen 45-nji orta mekdepde geçirilen dabaraly maslahat «Arkadag Serdarly bagtyýar ýaşlar ýyly — galkynyşa ganat berýän güýç» diýlip atlandyryldy. Türkmenistanyň Magtymguly adyndaky Ýaşlar guramasynyň Ahal welaýat Geňeşiniň, Türkmenistanyň Kärdeşler arkalaşyklarynyň welaýat birleşmesiniň hem-de welaýat Baş bilim müdirliginiň bilelikde guramagynda geçirilen maslahata bilim işgärleri, mekdep okuwçylary hem-de jemgyýetçilik guramalarynyň wekilleri gatnaşdy.

Türkmenistanyň Magtymguly adyndaky Ýaşlar guramasynyň VIII gurultaýynyň üstünlikli geçirilmeginiň şanyna geçirilen dabaraly maslahatda ýurdumyzda ýaşlar barada edilýän alada, jemgyýetimizde ýaşlaryň orny hakda söz açyldy. Ýaşlar forumynyň taryhy ähmiýeti dogrusyndaky çykyşlar dabaralary maslahatyň täsirliligini artdyrdy. Çykyşlarda Arkadag Serdarly bagtyýar ýaşlar ýylynda geçirilen Türkmenistanyň Magtymguly adyndaky Ýaşlar guramasynyň nobatdaky gurultaýynyň ýaşlar üçin täze gözýetimlere ýol açandygy, olary halal we päk zähmete ruhlandyrandygy aýratyn bellenip geçildi.

Buýsançly çykyşlara beslenen maslahata gatnaşyjylar ajaýyp döwri peşgeş beren Gahryman Arkadagymyzyň we Arkadagly Serdarymyzyň adyna päk ýürekden çykýan alkyşlaryny beýan etdiler.