Türkiýäniň Ulag we infrastruktura ministri Adil Karaismailoglu ýakynda Ankaranyň adyna Çehiýanyň Demirýollary hyzmatdaşlyk assosiasiýasynyň agzalarynyň birinden hatyň gelip gowşandygyny gürrüň berdi. Şol hatda 2024-nji ýyla Çehiýadan başlap, Gazagystana çenli syýahatçylyk gatnawlaryny ýola goýmak teklip edilýär. Bu ugur aşakdaky ýaly tertipde teklip edilýär: Çehiýa, Slowakiýa, Wengriýa, Bolgariýa, Türkiýe, Gruziýa, Azerbaýjan, Türkmenistan, Özbegistan we Gazagystan.

Adil Karaismailoglu: «Bu ugurdaky päsgelçilikleri aýyrmak üçin has köp tagalla edilmelidigini bellemek isleýärin» diýip, aýtdy. Şeýle hem ministr Türkiýäniň Ankara bilen Kars aralygynda hereket edýän «Gündogar Express» demir ýol arkaly gatnawy Baku şäherine çenli uzaltmagy teklip edýändigini aýtdy.

Belläp geçsek, «Baku-Tbilisi-Kars» (BTK) demir ýolunyň işe girizilmegi bilen diňe bir ýük daşamagyň däl, eýsem ýolagçy gatnawynyň hem ähmiýeti artdy. Türkiýäniň Ulag we infrastruktura ministri Adil Karaismailoglu Türki döwletleriniň guramasynyň çäginde ýol gatnawlary boýunça Bilelikdäki utgaşdyryjy geňeşi döretmegi teklip edýär. 

Oguljeren SAPAROWA,

Türkmen döwlet ykdysadyýet we 
dolandyryş institutynyň talyby.