Şu ýylyň 7-nji aprelinde Bütindünýä saglyk güni mynasybetli Aşgabat şäherinde köpçülikleýin welosiped ýörişiniň geçirilmegi göz öňünde tutulýar. Meýilleşdirilýän çärelere görülýän taýýarlyk baradaky hasabat Ministrler Kabinetiniň sanly ulgam arkaly geçirilen mejlisinde diňlenildi.

Gahryman Arkadagymyzyň başlangyjy bilen 3-nji iýunyň Bütindünýä welosiped güni diýlip yglan edilmegi hem-de şu ýylyň 15-nji martynda ýurdumyzyň başlangyjy bilen Birleşen Milletler Guramasynyň Baş Assambleýasynyň 76-njy sessiýasynyň 61-nji mejlisinde «Durnukly ösüşi gazanmak üçin köpçülikleýin welosiped sürmegi jemgyýetçilik ulag ulgamlaryna girizmek» atly Kararnamanyň biragyzdan kabul edilmegi ýurdumyzyň sporty we bedenterbiýe-sagaldyş hereketini ösdürmekden gazanýan üstünliklerine halkara bileleşigi tarapyndan ýokary baha berilýändiginiň we ykrar edilýändiginiň aýdyň subutnamasydyr.

Welosipedli ýöriş paýtagtymyzdaky Welosiped binasyndan badalga alar. Şeýle-de köpçülikleýin welosiped ýörişiň geçiriljek ugurlarynda medeniýet we sungat ussatlarynyň hem-de aýdym-saz toparlarynyň çykyşlary gurnalar. Şeýle çäreler Saglyk ýolunda hem dowam eder. Bu ýerde “Saglygym-baş baýlygym” atly köpçülikleýin bedenterbiýe-sport we sagdyn durmuş çäreleri, ýaryşlar we görkezme çykyşlary gurnalar.