Aşgabatda Türkmenistanyň Döwlet binagärlik-gurluşyk institutynyň 5 müň orunlyk täze binalar toplumy ulanmaga berildi. Täze bilim şäherçesi 1-nji sentýabrda — Bilimler we talyp ýaşlar gününde açyldy.

Açylyş dabarasyna Türkmenistanyň Prezidenti Serdar Berdimuhamedow gatnaşdy. Täze toplum Türkmenistanyň Senagatçylar we telekeçiler birleşmesiniň agzasy tarapyndan bina edildi.

32,2 gektar meýdany eýeleýän täze şäherçede 13 gatly baş bina, 8 fakultet we 28 kafedra, kitaphana hem-de mejlisler zaly ýerleşýär. Talyplar üçin 2 müň 600 orunlyk umumy ýaşaýyş jaýy, mugallymlar üçin bolsa iki sany, hersi 40 öýden ybarat ýaşaýyş jaýy guruldy.

Institutyň tejribehanalarynda gurluşyk, seýsmika, elektromehanika, himiýa we beýleki ugurlar boýunça döwrebap enjamlardan peýdalanylýar. Olaryň arasynda ýertitremäniň yrgyldylaryny emeli ýagdaýda döredip, binalaryň durnuklylygyny barlamaga mümkinçilik berýän enjam hem bar.

Täze toplum ISO-nyň bäş halkara standartyna laýyklyk güwänamalaryny aldy. Şeýle hem instituta Certiport Authorized Testing Center halkara synag merkeziniň derejesi berildi.

Täze binalar toplumy ýurdumyzyň binagärlik, gurluşyk we senagat pudaklary üçin ýokary hünärli hünärmenleri taýýarlamakda institutyň mümkinçiliklerini has-da giňelder.