Berkarar döwletiň bagtyýarlyk döwründe oba hojalygy pudagynyň ösdürilmegine döwlet derejesinde uly üns berilýär. Hormatly Prezidentimiziň baştutanlygynda durmuşa geçirilýän özgertmeler oba hojalygynyň ähli ugurlarynda ýokary netijeleri üpjün edýär. Şol ugurlaryň biri hem — halkymyzyň gadymy we milli ýörelgelerine daýanýan pileçilikdir.

Şu günler ýurdumyzyň ähli welaýatlarynda, şol sanda Ahal welaýatynyň Kaka etrabynda hem pile hasylyny ýygnamak boýunça gyzgalaňly işler dowam edýär. Bu sebitde pileçilige yhlas bilen ýapyşýan daýhan hojalyklary her ýylyň ýaz pasly bilen bilelikde päk zähmetiň miwesini almak ugrunda tutanýerli işleýärler.

Kaka etrabynyň pileçi kärendeçileri bellenilen meýilnamany ýerine ýetirmekde diňe bir meýilnamalaýyn sanlara ýetmek bilen çäklenmän, eýsem ony artygy bilen tabşyrmagy hem başardylar. Bu ýyl olaryň jemi 687 gap pile gurçuk tohumyndan 24 tonna pile tabşyrmak boýunça öňde goýlan maksady bar.

Pileçilik diňe bir ykdysady ähmiýetli ugur bolman, eýsem ekologiýa taýdan arassa önümçiligiň nusgasydyr. Pile bilen baglanyşykly zähmet — sabyrlylygy, tertip-düzgüni, gözelligi we yhlaslylygy talap edýär.

Şeýle ýokary görkezijiler diňe bir Kaka etrabynda däl, eýsem ýurdumyzyň ähli sebitlerinde alnyp barylýan pileçilik işleriniň netijesinde gazanylýar. Bu bolsa ýurdumyzda oba hojalyk önümçiliginiň toplumlaýyn ösdürilýändiginiň, döwlet tarapyndan berilýän goldawlaryň ýerlikli netijelerini görkezýär.
 

Arzuw Täjowa,
S.A.Nyýazow adyndaky Türkmen oba hojalyk
uniwersitetiniň talyby.