Paýtagtymyz Aşgabatda ýaşaýan Mommadowlaryň maşgalasy üçin täze ýyl turuwbaşdan düşümli, döwletli geldi. Enäniň we çaganyň saglygyny goraýyş ylmy-kliniki merkezinde täze ýylyň gadam goýan ilkinji minutlarynda olaryň ogul perzentleri dünýä indi. Bu oglanjyk täze, 2023-nji ýylda ýurdumyzda ilkinji dünýä inen çagadyr.

Öz ady bilen bile dünýä gelen oglanjygyň ata-enesiniň begenjiniň çägi ýok. Olar ýurdumyzda 2023-nji ýylyň «Arkadag Serdarly bagtyýar ýaşlar ýyly» diýen şygaryndan ugur almak bilen, täze ýylda ilkinji bolup dünýä inen ogullaryna Bagtyýar diýip at goýdular. Kiçijik Bagtyýar Mommadowlaryň döwletli maşgalasynyň üçünji perzendidir.

Doglan ogul bäbejigiň agramy 3 kilogram 840 gram, boýy 53 santimetr ölçeglerde bellige alyndy. Lukmanlaryň aýtmagyna görä, onuň ýagdaýlary kanagatlanarly. Bäbejige we onuň ejesine lukmanlar, şepagat uýalary tarapyndan hemme degişli gözegçilik işleri öz wagtynda geçirilýär.

Oglanjygyň ata-enesine hormatly Prezidentimiz Serdar Berdimuhamedowyň hem-de Türkmenistanyň Milli Geňeşiniň Halk Maslahatynyň Başlygy, Gahryman Arkadagymyz Gurbanguly Berdimuhamedowyň iberen sowgatlary gowşuryldy we Arkadagly Serdarymyzyň, Gahryman Arkadagymyzyň adyndan gutlaglar, iň gowy arzuwlar aýdyldy.

Täze ýylyň ilkinji pursatlarynda ogul bäbejigi dünýä inen Mommadowlaryň agzybir maşgala agzalary hem, öz nobatynda, berkarar döwletimizde çagalaryň döwlet derejesinde şeýle uly üns-aladalar bilen gurşalyp alynýandygy hem-de iberen ajaýyp sowgatlary üçin Arkadagly Serdarymyza we Gahryman Arkadagymyza tüýs ýürekden çykýan alkyşlaryny, hoşallyk sözlerini beýan edip, uzak ömür, berk jan saglygyny, il-ýurt bähbitli işlerinde mundan beýläk-de rowaçlyklaryň hemra bolmagyny arzuwladylar. 

Orazgylyç ORAZGELDIÝEW,

Türkmen döwlet binagärlik-gurluşyk
institutynyň mugallymy.