Berkarar döwletiň täze eýýamynyň Galkynyşy döwründe ýurdumyz ösüşiň täze belentliklerine tarap öňe barýar. Arkadagly Serdarymyz beýleki pudaklar bilen bir hatarda bilim ulgamyny ösdürmäge aýratyn ähmiýet berýär. Türkmenistanda bilim ulgamyny kämilleşdirmäge gönükdirilen kanunçylyk namalary kabul edildi. Netijede, milli bilim ulgamynyň hukuk binýady has-da berkidildi. Mugallymlaryň, terbiýeçileriň netijeli işlemeklerine, bilimiň ähli derejelerinde okatmagyň we terbiýelemegiň usulyýetiniň kämilleşdirilmegine giň ýol açyldy.

Ýaşlaryň döwrebap ylym-bilim almaklary, daşary ýurt dillerini kämil öwrenmekleri üçin ýurdumyzyň ähli bilim-terbiýeçilik edaralarynda sanly ulgama geçilmegi, täze tehnologiýalaryň ornaşdyrylmagy häzirkizaman bilim ulgamynyň işini barha ilerledýär. Ýurdumyzyň mekdeplerinde kämil kompýuter tehnologiýalary bilen enjamlaşdyrylan lingafon okuw otaglary bar. Olar daşary ýurt dillerini öwretmek hemde öwrenmek üçin zerur bolan tehnologiýalar bilen üpjün edildi. Daşary ýurt dilini öwretmekde täze tehnologiýalary, usullary peýdalanmak oňat netije berýär.

Arkadagly Serdarymyzyň belleýşi ýaly, ýaşlary ylymly bolan döwletiň sütünleri berkarar, güýji mizemezdir. Biz ýaş nesliň bagtyýar geljegi barada ýadawsyz alada edýän hormatly Prezidentimize köp sagbolsun aýdýarys. Arkadagly Serdarymyzyň janynyň sag, başynyň dik, ömrüniň uzak bolmagyny, alyp barýan döwlet ähmiýetli işleriniň rowaç almagyny arzuw edýäris. 

Aýnur BAHTYÝAROWA,

Döwletmämmet Azady adyndaky 
Türkmen milli dünýä dilleri 
institutynyň talyby.