Köpetdagyň eteginde ýerleşýän Janly tebigatyň milli muzeýinde nil krokodiliniň çagasy boldy. Adatça krokodiller gury ýerde höwürtgeleýärler we ýumurtgalaryny şol ýerde goýýarlar. Aşgabadyň haýwanat bagynyň işgärleri krokodillerden nesil almak maksady bilen, olaryň ýumurtgasyny tomsuň başynda inkubatora goýdular we 120 günden soň çaga krokodiliň ýumurtgadan çykyşyna şaýat boldular. Şol sebäpli hem Häzirki wagtda çaga krokodil aýratyn terrariumda karantin edildi. Onuň birneme soňrak - güýç-kuwwata gelenden soň myhmanlara görkeziljekdigi aýdylýar.

Ýurdumyza nil krokodilleriniň ilkinji çagasy 2010-njy ýylda getirildi. Şol wagt olar 3 ýaşyndady. Ýene-de belläp geçsek, bu ýere gelýänleriň arasynda iň meşhur haýwan bolan torly žiraflaryň hem ýaňy-ýakynda ilkinji çagasy boldy.