Änew şäherindäki Milli «Ak bugdaý» muzeýiniň mejlisler jaýynda, Türkmenistanyň Magtymguly adyndaky Ýaşlar guramasynyň VII gurultaýyna taýýarlyk işleriniň çäginde, Türkmenistanyň Magtymguly adyndaky Ýaşlar guramasynyň Ahal welaýat Geňeşiniň nobatdaky hasabat-saýlaw maslahaty geçirildi. Oňa ýaşlar guramasynyň işgärleridir işjeň agzalary, jemgyýetçilik guramalarynyň wekilleri hem-de beýleki myhmanlar gatnaşdy.

Maslahatyň başynda, Türkmenistanyň Magtymguly adyndaky Ýaşlar guramasynyň Ahal welaýat Geňeşiniň başlygy Merdanaly Orazberdiýewiň hasabaty diňlendi. Hasabat döwründe wagyz-nesihat duşuşyklarynyň jemi 3500-si, aýdym-sazly dabaralaryň 535-si, sport ýaryşlarynyň 562-si, dabaraly maslahatlardyr duşuşyklaryň 1450-si geçirildi. Türkmenistanyň Magtymguly adyndaky Ýaşlar guramasynyň welaýat, şäher, etrap Geňeşleri boýunça şu güne çenli ilkinji guramalaryň jemi 673-si hereket edip, agzalarynyň sany 80 müň 700-e barabardyr. Hasabat döwründe ýaşlaryň 9 müňden gowragy Ýaşlar guramasynyň agzalygyna kabul edildi. Ýaşlar guramalarynyň işgärleridir agzalary metbugat sahypalarynda, tele we radioýaýlymlarda yzygiderli çykyş edip, döwrümiziň ösüşlerine seslerini goşýarlar.

Işjeň häsiýete eýe bolan hasabat-saýlaw maslahatynda garalan meseleler boýunça anyk wezipeler kesgitlendi.