Änew şäherinde ýerleşýän Türkmenistanyň Milli «Ak bugdaý» muzeýinde geçirilen «tegelek» stoluň başyndaky söhbetdeşlik Türkmenistanyň Milli Geňeşiniň we jemgyýetçilik wekilleriniň bilelikdäki maslahatyndan gelip çykýan wezipelere bagyşlandy. Türkmenistanyň Kärdeşler arkalaşyklarynyň Ahal welaýat birleşmesiniň we agzalan muzeýiň bilelikde guramagynda bolan söhbetdeşlik uly täsirlere beslendi.

«Tegelek» stoluň başyna ýygnananlar Gahryman Arkadagymyzyň halk häkimiýetiniň ýokary wekilçilikli edarasyny — Türkmenistanyň Halk Maslahatyny döretmek boýunça öňe süren teklibiniň Milli Geňeşiň we jemgyýetçilik wekilleriniň bilelikdäki maslahatynda goldaw tapyp, degişli çözgüdiň kabul edilmeginiň halkymyzda buýsanç duýgusyny döredendigini bellediler. Gahryman Arkadagymyzyň Türkmenistanyň Halk Maslahatynyň Başlygy wezipesine saýlanylmagy, şeýle-de Türkmen halkynyň Milli Lideri diýlip kanun esasynda ykrar edilmegi bilen bagly buýsançly gürrüňe söhbetdeşlikde aýratyn ähmiýet berildi.

«Tegelek» stoluň başyndaky söhbetdeşlige gatnaşanlar halkymyzy döwletli döwrana ýetiren Gahryman Arkadagymyzyň hem-de Arkadagly Serdarymyzyň adyna alkyş sözlerini aýtdylar.