Ak bugdaý etrap merkezi kitaphanasynda we onuň ýerlerdäki kitaphana şahamçalarynda baý many-mazmunly çäreler yzygiderli geçirilýär. Kitaphana okyjylary ýylyň şygary we şanly seneler mynasybetli geçirilýän dabaralara, döredijilik duşuşyklaryna, baýramçylyk kitap sergilerine, şeýle-de edebiýat agşamlaryna uly höwes bilen işjeň gatnaşýar.

Ildeşlerimiziň arasynda kitaphanalaryň döwrebap hyzmatlaryna isleg barha ýokarlanýar. Munuň şeýledigine şanly ýylymyzyň başyndan bäri kitaphana hyzmatlaryndan peýdalanyjylaryň sanynyň artmagy hem şaýatlyk edýär. Has takygy, şu ýylyň ýedi aýynda etrap merkezi kitaphanasy boýunça täze ýazylan okyjylaryň sany 320-ä, Bereketli zaman şahamçasy boýunça 165-e, Berkararlyk şahamçasy boýunça 163-e deň bolup, agzalan kitaphanalaryň okyjylarynyň umumy sany degişlilikde 3878-e, 1694-e, 1601-e ýetdi. Şol döwürde «Galkynyş» kitap merkezinden tapgyrlaýyn gelip gowşan gymmatly kitaplaryň hasabyna kitaphanalaryň kitap gaznasy has-da baýlaşdy. Okyjylar bitewi elektron kitaphana ulgamynyň hyzmatyndan işjeň peýdalanýarlar.