Türkmen ahalteke atlary adamzat medeniýetiniň gymmatly miraslarynyň biri hökmünde dünýäde giňden tanalýar. Özboluşly gözelligi, çydamlylygy we ýokary hereket ukyby bilen tapawutlanýan bu bedewlerimiz asyrlaryň dowamynda türkmen topragynda kemala gelipdir. Ahalteke atlary diňe bir atçylyk sungatynyň nusgasy bolman, eýsem milli buýsanjyň hem nyşanydyr.

Bu bedewleriň genofonduny gorap saklamak we ösdürmek häzirki döwürde aýratyn ähmiýete eýedir. Türkmenistanda ahalteke atlarynyň arassa tohumyny saklamak boýunça ylmy-seleksiýa işleri yzygiderli alnyp barylýar, döwrebap atçylyk toplumlary döredilýär we halkara hyzmatdaşlyk giňeldilýär. Bu çäreler türkmen bedewleriniň dünýä derejesindäki abraýyny has-da pugtalandyrýar.

Ahalteke atlary halkara sergilerinde, sport ýaryşlarynda we medeni çärelerde Türkmenistanyň nyşany hökmünde çykyş edýär. Olar milli mirasymyzyň aýrylmaz bölegi bolup, geljek nesillere geçirilýän ruhy gymmatlykdyr. Türkmen bedewine goýulýan sarpa halkymyzyň taryhyna, medeniýetine we döwletliligine bolan hormatynyň aýdyň beýanydyr.

Mähriban ALIÝEWA,
Halkara senagatçylar we telekçiler
uniwersitetiniň talyby.