Ahal welaýatynyň maldarlary dowarlaryň güýz gyrkymyna taýýarlykly girişip, möhüm çäräni üstünlikli alyp barýarlar. Has dogrusy, welaýatyň Ak bugdaý etrabynda bu jogapkärli iş has-da guramaçylykly ýerine ýetirilýär. Şu ýyl welaýatyň maldarlary sagdyn owlak-guzulary almakda uly tagallalar etdiler. Maldarlar häzirki möhüm möwsümiň dowamynda dowarlaryň on müňlerçesinde güýz gyrkymyny geçirmegi meýilleşdirýärler.

Möwsümiň ýokary depgine eýe bolmagy üçin,  onuň öň ýanyndaky taýýarlyk işleri örän guramaçylykly alnyp baryldy. Güýz gyrkymy üçin medeni sebitden hem-de Garagum sährasyndan amatly ýerler saýlanyp alyndy. Şeýle-de zähmet çekýänleriň iş we dynç alyş şertleri göwnejaý üpjün edildi. Bu işde geçen ýyllarda toplanan tejribä berk eýerýän etrabyň maldarlary gyş üçin ýeterlik mukdarda ot-iým ätiýaçlygyny döretmegi hem ünsden düşürmeýärler.