Ahal welaýat polisiýa müdirliginiň, Türkmenistanyň Magtymguly adyndaky Ýaşlar guramasynyň Ahal welaýat Geňeşiniň we beýleki jemgyýetçilik guramalarynyň bilelikdäki meýilnamasy esasynda Arkadag Serdarly bagtyýar ýaşlar ýyly mynasybetli welaýatymyzda wagyz-nesihat häsiýetli duşuşykdyr maslahatlar geçirilýär. Edara-kärhanalarda zähmet çekýän ýaşlaryň, ýokary synp mekdep okuwçylarynyň, ýaşlar guramasynyň işjeň agzalarynyň arasynda geçirilýän bu çäreler netijeli häsiýete eýe bolýar.

Berkarar döwletiň täze eýýamynyň Galkynyşy döwründe ýaşlaryň bagtyýar durmuşda ýaşamagyny gazanmak, döwrebap bilim almagyny üpjün etmek, olary watansöýüjiligiň we ynsanperwerligiň belent ruhunda terbiýelemek bilen bagly edilýän tagallalar dogrusyndaky gürrüňe wagyz-nesihat duşuşyklarynda aýratyn üns çekilýär. Ak bugdaý etrabyndaky ýöriteleşdirilen 45-nji orta mekdepde geçirilen duşuşygyň has-da gyzykly bolandygyny aýratyn nygtamak bolar. Ýaşlary ýurdumyzda giňden ýaýbaňlandyrylan taryhy ähmiýetli işlere işjeň gatnaşmaga giňden çekmek, olaryň sagdyn ruhly, berk bedenli bolmagyny gazanmak bu duşuşygyň esasy maksady boldy.

Duşuşyga gatnaşyjylar berkarar Watanymyzda ýaşlar üçin giň mümkinçilikleri döredýän, ajaýyp işleri durmuşa geçirýän Milli Liderimiziň we Arkadagly Serdarymyzyň adyna alkyş sözlerini aýtdylar.