1-nji sentýabrda bellenilýän Bilimler we talyp ýaşlar güni mynasybetli ýurdumyzyň ähli künjeginde dürli çäreler geçiriler. Şolaryň hatarynda  Magtymguly adyndaky Ýaşlar guramasynyň VII gurultaýy hem bar.

1-nji sentýabr güni Garaşsyzlyk binasyna hem-de Ahal welaýatynyň Gökdepe etrabynyň Yzgant obasyndaky 27-nji orta mekdepdäki Berdimuhamet Annaýewiň ýadygärligine gül goýmak dabaralary geçiriler. Orta, ýörite orta hem-de ýokary okuw mekdeplerinde dabaraly nyzamlar guralar. Ýurdumyzyň ähli bilim edaralarynda «Halkyň Arkadagly zamanasy» ady bilen ilkinji okuw sapaklary geçiriler. Şeýle hem 1-nji synp okuwçylaryna Türkmenistanyň Prezidentiniň adyndan kompýuterler gowşurmak dabaralary geçiriler.

Türkmenistanyň Prezidentiniň tabşyrygy boýunça, Hökümet agzalary 1-nji sentýabrda orta we ýokary okuw mekdeplerine baryp, ýaşlary täze okuw ýylynyň başlanmagy bilen gutlarlar.