Tejen etrabynyň Dostluk daýhan birleşiginiň çäginde ýerleşýän “Nedirgala” hususy kärhanasy esasan pamidor goýatmagyny öndürmek bilen meşgullanýar. Bu kärhana ekologiýa taýdan arassa çig maldan öndüren ýokumly pamidor önümleri bilen ilat arasynda uly meşhurlyk gazandy. Kärhananyň dürli görnüşli pamidor önümleri Diýarymyzyň söwda nokatlarynda iň geçginli önümlere öwrüldi. Munuň şeýle bolmagynda önümçilik bölümlerindäki häzirki zaman azyk tehnologiýalarynyň ähmiýeti uludyr.

Kärhanada ýörite şol önümleri banka we beýleki gaplara gaplaýan ýörite seh işleýär. Bu ugurda işleýän telekeçi işewürler ýerine ýetirýän işleriniň hiline uly üns berýärler. Agzalan kärhana tarapyndan halkyň goýatmak önümlerine bolan isleglerini doly kanagatlandyrmak maksady bilen uly iş alyp barýarlar. Bu ugurda işleýän daýhan hojalyklary we kärendeçi daýhanlar bilen ýörite şertnamalar baglaşýarlar. Şeýle hem olar tarapyndan halk köpçüliginiň pamidor goýatmagyna, üwmejine, şerbetine bolan isleglerini has hem içgin öwrenýärler.

Mukaddes Garaşsyzlygymyzyň şanly 30 ýyllygyna barýan häzirki günlerimizde azyk önümleri bilen ýurdumyzyň ilatynyň saçagyna bereket goşýan kärhananyň işçi-hünärmenleriniň zähmet gadamlary barha batlanýar. Bu kärhanada häzirki zamanyň ülňelerine laýyk gelýän döwrebap ýyladyşhana bolup, onda güýzlik ekinlerini ösdürip ýetişdirmeklik bilen baglanyşykly işler hem alnyp barylýar