Berkarar döwletiň täze eýýamynyň Galkynyşy döwründe ýurdumyzyň awtomobil ulaglary ulgamynda Arkadagly Serdarymyzyň tagallalary netijesinde uly ösüşler, özgerişler gazanylýar. Güneşli Diýarymyzyň şäherlerinde we obalarynda hyzmat edýän halkara ülňülerine laýyk gelýän ýokary hilli awtobuslar, taksiler halkymyzyň kalbynda uly buýsanç, kanagatlanma duýgusyny döredýär. Bu ulgama iň ýokary hilli ulaglaryň yzygiderli satyn alnyp, halkyň hyzmatyna hödürlenmegi, şäherara we şäheriçi gatnawlarynyň ýokary derejede ýola goýulmagyna ýardam berýär. «Lebapawtoulag» önümçilik birleşigi 2022-nji ýyly üstünlikli tamamlap, «Arkadag Serdarly bagtyýar ýaşlar» ýylyny täze maksatlar bilen garşylan kärhanalaryň biridir. Geçen ýylda ýük daşamakdan, ýolagçy gatnatmakdan we gaýry hyzmatlardan alnan girdejiler munuň şeýledigini tassyklaýar. 

Arkadagly Serdarymyz Türkmenistanyň Prezidenti wezipesine girişmek dabarasynda eden çykyşynda: «Watan diňe halky bilen Watandyr! Döwlet diňe halky bilen döwletdir!» diýip, nygtamak bilen, alyp barjak uly döwlet syýasatynyň baş ugruny kesgitledi. Bu dünýä nusgalyk ýörelge bolsa Gahryman Arkadagymyzyň «Döwlet adam üçindir!» diýen parasatly syýasatyndan gözbaş alýar. Mähriban halkynyň egsilmez döredijilik güýjüne daýanýan hormatly Prezidentimiz hemişe ilatyň jana-jan bähbitlerini araýar we düýpli özgertmeleri amala aşyrýar. Bu diýilýänler halkymyza awtoulag hyzmaty bilen üpjün etmek meselesinde hem aýdyň görünýär. Geçen ýylda girdejiniň agramly bölegi, has takygy, meýilnama boýunça 2576 müň tonna, iş ýüzünde daşalany 2913,6 müň tonnadan gowrak  ýük daşalyp, 113,1 göterim ösüş gazanyldy. Ýolagçy gatnatmagyň tabşyrygy hem 109 göterimden geçirilip, meýilnama boýunça 18 million 155 müň ýolagçy, iş ýüzünde 19 million 794 müň adam gatnadyldy. Bu görkezijiler önümçilik birleşigine gelýän buýurmalaryň netijesinde, kuwwatly ýük awtoulaglaryň bökdençsiz we gurat işledilmeginiň hem-de ýolagçylara edilýän awtoulag hyzmatlarynyň hiliniň gowulandyrylmagynyň, mümkin bolan ilatly ýerlere täze awtobus gatnawlarynyň ýola goýulmagynyň hasabyna gazanyldy. Önümçilik birleşigine degişli kärhanalarda ýük daşamakdan we ýolagçy gatnatmakdan daşary bejeriş işleriniň dürli görnüşleri we käbir binalary kärendä bermek arkaly hem goşmaça girdejiler alynýar.

Geçen ýyl ýük daşamakda önümçilik birleşigine degişli «Kamaz», «STEYR», «MMZ», «ZIL», «GAZ» kysymly awtoulaglar ulanyldy. Ýolagçy gatnatmaga bolsa, «Hyundai», «Iran Khodro», «PAZ», «Yutong» kysymly awtobuslar, «Hyundai Elentra» kysymly taksi ulaglary gatnaşdy.

Welaýat merkezimizde hormatly Prezidentimiziň ak pata bermeginde täze awtomenziliň ulanylmaga berilmegi bolsa geçen ýylyň ýylyň şanly wakalarynyň biri boldy. Täze awtomenzilden häzirki wagtda şäherara gatnawlaryň 20-den gowragy amala aşyrylýar. Bu ýerde ýolagçylara ýokary derejede hyzmat edilýär. Täze binada işgärleriň amatly şertlerde zähmet çekmekleri, kadaly dynç almaklary üçin ähli zerur şertleriň döredilendigi aýratyn bellenilmäge mynasypdyr. Täze awtoulag menziliniň çäginden «Türkmenawtoulaglary» agentliginiň «Lebapawtoulag» önümçilik birleşigi şäheriçi awtobus gatnawyny ýola goýdy. Häzirki wagtda şunuň bilen birlikde şäherara hem-de welaýat boýunça awtobus gatnawlary täze awtoulag menzili arkaly amala aşyrylýar.

Hormatly Prezidentimiziň taýsyz tagallasy bilen ýurdumyzyň sebitlerindäki awtoulag kärhanalarynyň mümkinçilikleri yzygiderli artdyrylýar. Öz işleriniň ussady, yhlasly zähmetini aýaman, arman-ýadaman zähmet çekýän sürüjiler önümçilik birleşigimizde barmak basyp sanardan köp. Bu ýerde zähmet çekýän hünärmenlerdir, işçileriň aglaba böleginiň ýaşlardygyny aýratyn bellenmäge mynasyp. Bu işler «Arkadag Serdarly bagtyýar ýaşlar» ýylynda hem ýokary depgin bilen dowam etdiriler. 

Möwlam HAÝTGULYÝEW,

Türkmenistanyň Ministrler Kabinetiniň
ýanyndaky Ulag we kommunikasiýalar
agentliginiň «Türkmenawtoulaglary»
agentliginiň «Lebapawtoulag» önümçilik 
birleşiginiň ilkinji Ýaşlar guramasynyň başlygy.