«Uly çynar» hojalyk jemgyýeti ýanwar aýynda Özbegistana we Birleşen Arap Emirliklerine plastik önümlerini eksport etdi. Bu kompaniýa 2009-njy ýyldan bäri plastik gaplaryň gapaklarynyň we tutawaçlarynyň önümçiligini alyp barýar. 2018-nji ýylda «Uly çynar» halkara «ISO» güwänamasyna hem mynasyp bolupdy.

Aşgabat şäheriniň çäginde ýerleşýän hojalyk jemgyýetiniň önümçilik kärhanasynda Hytaýyň enjamlary ornaşdyryldy. Kärhananyň häzirki zaman tehnologiýalar bilen üpjün edilmegi bu ýerde plastik gapaklaryň sagatda 16200 sanysyny öndürmäge mümkinçilik berýär. Önümçilikde ýerli we daşary ýurt çig malyndan peýdalanylýar. Kärhanada işçi-hünärmenleriň ýüzden gowragy dört çalşykda zähmet çekýär. Bu ýerde öndürilýän önümler içerki we daşarky bazarda ýokary islegden peýdalanýar. Häzirki wagtda hojalyk jemgyýeti daşary ýurtlaryň birnäçesine plastik gapaklaryň eksportyny amala aşyrýar.