Şu gün — 25-nji maýda ýurdumyzyň umumybilim berýän orta mekdepleriniň uçurymlary üçin soňky jaň kakyldy. 

Okuw ýylynyň tamamlanmagyna bagyşlanan baýramçylyk çäresi ir säherden başlady. Ir bilen mekdepleriň göreldeli uçurymlary, bilim ulgamynyň işgärleri Watanymyzyň iň täze taryhynyň nyşany bolan Garaşsyzlyk binasyna hem-de Ahal welaýatynyň Gökdepe etrabynyň Yzgant şäherçesindäki 27-nji orta mekdepde oturdylan Berdimuhamet Annaýewiň ýadygärligine ajaýyp gül desselerini goýdular.

«Ýurdumyz berkarar, gadamymyz batly — Arkadag Serdarly ýaşlarymyz bagtly!» atly şygar astynda ýaýbaňlandyrylan baýramçylyk dabaralary ýakymly duýgulara beslendi. Döwlet Baştutanymyzyň iberen Gutlagynyň okalmagy orta mekdepleriň uçurymlary üçin durmuş ýoluna ak pata boldy. Baýramçylyk dabaralarynda ata-eneleriň, mugallymlaryň we halypalaryň adyna ýagşy sözler, gutlaglar aýdyldy, uçurymlara rowaçlyklar, üstünlikler arzuw edildi.

Ak mekdepde bilim alan döwürlerinde dürli ugurlarda has tapawutlanan okuwçylara ýadygärlik sowgatlary gowşuryldy. Uçurymlar mekdep bilen, mugallymlary bilen hoşlaşdylar, mugallymlara hem-de ata-enelere hoşallyk bildirdiler, täze okuw ýylynda mekdebiň bosagasyndan ilkinji gezek ätlemäge taýýarlanýan körpelere bilimler dünýäsine gadam urmagyň özboluşly nyşanyny — «Altyn açary» gowşurdylar. Ak arzuwlaryň nyşanyna öwrülen ak kepderiler al-asmanda ençeme öwrüm etdiler.