Türkmenabadyň tikin fabriginiň tikinçileri şu ýylyň meýilnamasyny möhletinden öň 143 göterim berjaý etdiler. Fabrikde şu ýyl 35 million 518 müň manatlykdan gowrak önüm öndürmek boýunça meýilnama dokuz aýyň dowamynda ýerine ýetirilip, 38 million 194 müň 232 manatlyk önüm öndürildi. Geçen ýylyň degişli döwri bilen deňeşdirilende, ösüş depgini 113 göterime barabar boldy.

Belläp geçsek, fabrik geçen ýyl hem ýyllyk meýilnamany 147 göterim berjaý etdi. Kärhanada meşhur kompaniýalaryň tikin maşynlarynyň önümçilige ornaşdyrylmagy zähmet adamlarynyň işe bolan höweslerini has ýokarlandyrdy. Netijede zähmet öndürijiligi batlandy we önümleriň hili hyrydarlarynyň göwünlerine has ýarap ugrady. Içerki bazarda fabrigiň önümlerine isleg bildirýän hyrydarlaryň sany ozalky ýyllardakydan has artdy. Tikinçileriň çeper ellerinden çykýan önümler ösýän islegleri kanagatlandyryp ugrady.

Kärhananyň önümçilik sehlerinde tikinçileriň öndürijilikli işlemekleri üçin ähli amatly şertler döredilipdir. Şonuň üçin aýlyk meýilnamalar 1,5-2 esse diýlen ýaly yzygiderli berjaý edilýär. Häzirki wagtda fabrikde toparlaryň 9-sy özara bäsdeşlik esasynda zähmet çekýär.