Türkmen talyplary 2024-nji ýylyň 7-10-njy noýabry aralygynda Polşanyň Katowiçe şäherinde geçirilen matematika boýunça halkara bäsleşiginde ýokary netijeler gazandylar. Matematika bäsleşiginde şahsylykda 6 altyn, 9 kümüş, 11 bürünç medal gazanyldy, toparlaýyn bäsleşikde bolsa 1 kümüş we 3 bürünç medal eýe edildi. Bu üstünlik barada Magtymguly adyndaky Türkmen döwlet uniwersitetiniň resmi saýtynda habar berildi.

Bäsleşige Angliýa, Awstriýa, Şweýsariýa, Polşa, Slowakiýa, Sloweniýa, Wengriýa, Özbegistan we Türkmenistan ýaly döwletleriň 35 ýokary okuw mekdebinden 160-a golaý talyp gatnaşdy. Türkmenistandan bolsa 10 ýokary okuw mekdebiniň talyplary wekilçilik etdiler.

Şahsy bäsleşikde gazanylan medallar:

• Magtymguly adyndaky Türkmen döwlet uniwersiteti – 3 altyn, 2 kümüş, 1 bürünç;
• Halkara ynsanperwer ylymlary we ösüş uniwersiteti – 2 altyn, 2 kümüş, 1 bürünç;
• Oguz han adyndaky Inžener-tehnologiýalar uniwersiteti – 1 altyn, 1 bürünç;
• Türkmen döwlet binagärlik-gurluşyk instituty – 2 kümüş;
• Döwlet energetika instituty – 1 kümüş, 2 bürünç;
• Telekommunikasiýalar we informatika instituty – 1 kümüş, 2 bürünç;
• Seýitnazar Seýdi adyndaky Türkmen döwlet mugallymçylyk instituty – 1 kümüş;
• Türkmen döwlet ykdysadyýet we dolandyryş instituty – 2 bürünç;
• S.A.Nyýazow adyndaky Türkmen oba hojalyk uniwersiteti – 1 bürünç;
• Türkmen oba hojalyk instituty – 1 bürünç.

Toparlaýyn bäsleşikde:

• Halkara ynsanperwer ylymlary we ösüş uniwersitetiniň topary kümüş medal,
• Magtymguly adyndaky Türkmen döwlet uniwersitetiniň topary bürünç medal,
• Türkmen döwlet ykdysadyýet we dolandyryş instituty bilen Döwlet energetika institutynyň bilelikdäki topary bürünç medal,
• Magtymguly adyndaky Türkmen döwlet uniwersitetiniň, Seýitnazar Seýdi adyndaky Türkmen döwlet mugallymçylyk institutynyň, S.A.Nyýazow adyndaky Türkmen oba hojalyk uniwersitetiniň, Türkmen oba hojalyk institutynyň bilelikdäki topary bürünç medal gazandy.

Türkmen talyplarynyň halkara derejesinde gazanan bu üstünligi ýurduň bilim ulgamynyň ýokary derejesini we ýaşlaryň zehinini görkezýän möhüm wakalaryň biridir.