Häzirki wagtda bilim ulgamynda halkara hyzmatdaşlyk täze derejelere çykýar. Şu nukdaýnazardan, Döwletmämmet Azady adyndaky Türkmen milli dünýä dilleri institutynyň ylmy işler boýunça prorektory Selbi Batyrowanyň Koreýa Respublikasyna sapary möhüm ähmiýete eýe boldy.

Ol Kangwon milli uniwersitetiniň guramagynda Seul we Çhunçhon şäherlerinde geçirilen «Bilelikdäki geljek: global zehin we ýerli jemgyýet» atly halkara bilim maslahatyna gatnaşdy. Maslahatda türkmen wekili Türkmenistanda koreý dili boýunça bilim berlişiniň we onuň öwrenilişiniň häzirki ýagdaýy barada çykyş edip, bu ugurdaky tejribeler bilen paýlaşdy.

Maslahatyň çäklerinde türkmen wekiliýeti üçin Çhunçhon şäheriniň häkimligine gezelenç guraldy. Şeýle-de, Döwletmämmet Azady adyndaky Türkmen milli dünýä dilleri instituty bilen Kangwon milli uniwersitetiniň arasyndaky hyzmatdaşlygyň geljegi ara alnyp maslahatlaşyldy.

Iki ýokary okuw mekdebiniň arasynda magistr bilim maksatnamasynyň ýola goýulmagy boýunça anyk teklipler öňe sürüldi. Netijeli geçen gepleşikleriň netijesinde iki tarap hem bu ugurda hyzmatdaşlygy ösdürmäge taýýardyklaryny mälim etdiler.

Bu halkara bilim çäresi, ilkinji nobatda, Türkmenistanda koreý dili we medeniýeti boýunça bilim berlişini kämilleşdirmäge, şeýle hem iki ýurduň ýokary okuw mekdepleriniň özara tejribe alyşmagyna mümkinçilik döredýär. Şeýle çäreler, geljekde hem ýokary hünärli, halkara derejesinde öz ugry boýunça ösen bilim alýan ýaşlary taýýarlamakda möhüm rol oýnar.