Daşoguz welaýatynyň Boldumsaz etrabynda ýerleşýän, Türkmenistanyň Senagatçylar we telekeçiler birleşmesiniň agzasy «Peýnirçi» hususy kärhanasynda dürli görnüşli peýnir önümçiligi alnyp barylýar. Hususy kärhanada hünärmenleriň ençemesi zähmet çekip, olar süýt önümlerini, hususan-da, peýniri taýýarlamagyň tehnologiýasyndan oňat baş çykarýarlar. Süýdüň ýerli telekeçilerden şertnama esasynda alynmagy önümleriň tebigy, ekologiýa taýdan arassa bolmagyny şertlendirýär. Önümçiligiň barşynda süýdüň gerekli ýylylyk derejesinde uýadylmagyna, zerur goşundylaryň degişli mukdarda goşulmagyna berk gözegçilik edilýär.

Şeýle bolansoň, bu ýerde öndürilip, «Ýaýla» haryt nyşany bilen ýerli bazarlara, söwda nokatlaryna we dükanlara ýaýradylýan ençeme görnüşli peýnirler diýseň geçginli. Ýerli ilat tarapyndan bu önümleriň täzeligine satyn alynmagy we dowamly isleg bildirilmegi hususy kärhananyň hünärmenlerini önümçilik depginini has-da artdyrmaga höweslendirýär.