«Täze saraý» hojalyk jemgyýeti dokma önümleriniň dürli görnüşleriniň önümçiligi bilen tanalýar. Kärhana Aşgabat şäheriniň çäginde ýerleşýär. Şu günler kärhanada gyşky egin-eşikleriň önümçiligi batly depginde alnyp barylýar. Bu ýerde öndürilýän erkek adamlar we çagalar üçin niýetlenilen keltekçe, güpbi ýaly ýyly egin-eşikler galyňlygy, hiliniň ýokarylygy bilen müşderileriň ünsüni özüne çekýär.

Kärhana Türkiýäniň, Hytaýyň enjamlary bilen enjamlaşdyrylyp, bu ýerde günde egin-eşikleriň 50-60 toplumy öndürilýär. Kärhanada önümçilik üçin, esasan, ýerli çig mal ulanylýar. Bu ýerde öndürilýän dokma önümleriniň aglabasyny dürli kärde zähmet çekmäge niýetlenen (aşpez, gurluşykçy, lukman) ýörite egin-eşikler düzýär.

Kärhanada erkek adamlar, zenanlar we çagalar üçin niýetlenen sport egin-eşikleriniň toplumy, müşderileriň sargytlary esasynda dürli ýaşdaky adamlar üçin ýörite egin-eşikler taýýarlanylýar. Önümler «TS» haryt nyşany bilen ýurdumyzyň söwda nokatlarynda elýeterli bahalardan alyjylara hödürlenilýär. Mundan başga-da, buýurmalar esasynda önüm öndürilýär.