«Anadolu» habar agentligi Türkiýäniň Energetika we tebigy baýlyklar ministri Fatih Dönmeziň Berlinde geçirilen 4-nji türk-nemes energiýa forumynda eden çykyşyna salgylanyp, Türkiýe döwletiniň türkmen tebigy gazyny beýleki ýurtlaryň bazarlaryna üstaşyr geçirmäge taýýardygy baradaky habary ýaýratdy.

Fatih Dönmez öz çykyşynda: «Ýewropa ýurtlarynyň köpüsi gaz isleglerini kanagatlandyrmak üçin Türkiýe bilen aragatnaşyk saklaýar. Türkiýe - Hazar sebitiniň tebigy baýlyklaryny, esasanam Türkmenistanyň tebigy gazyny, Ortaýer deňzi sebitiniň, esasan-da Ysraýylyň tebigy gazyny we geljekde Yragyň tebigy baýlyklaryny ýurdumyza we beýleki ýurtlaryň bazarlaryna ugradylmagy üçin elinden gelenini etmäge taýýar» - diýip, belläp geçdi.