Şu ýyl paýtagtymyzyň esaslandyrylmagyna 140 ýyl dolýar. Hormatly Prezidentimiziň Ministirler Kabinetiniň 7-nji maýda geçirilen Mejlisinde özüniň “Ak şäherim Aşgabat” atly kitabyny tamamlandygyny aýtmagy bu şanly baýramçylyk mynasybetli halkymyza uly toý sowgady boldy. Häzirki günlerde ýurdumyzyň dürli künjeklerinde toý sowgadynyň tanyşdyrylyş dabaralary dowam edýär. Şeýle dabaralarynyň biri hem Sarahs etrap Medeniýet öýünde Sarahs etrap häkimliginiň, Türkmenistanyň Magtymguly adyndaky Ýaşlar guramasynyň Sarahs etrap Geňeşiniň, Türkmenistanyň Kärdeşler arkalaşygynyň Sarahs etrap birleşmesiniň gurnamaklarynda guramaçylykly geçirildi. Dabara etrabyň bilim ulgamynda,edara-kärhanalarynda, etrap hassahanasynda zähmet çekýän raýatlar we il sylagly ýaşulylar, kümüş saçly eneler gatnaşdylar. Dabarada çykyş edenler Gahryman Arkadagymyzyň bu toý sowgady bolan kitaby bilen dabara gatnaşyjylary tanyşdyryp, ol kitapda paýtagtymyz Aşgabadyň tarypyny özünde jemleýän gymmatly maglumatlar, fotosuratlar we awtoryň filosofiki pikirleri ýerleşdirilip, baş şäherimiziň ýurduň syýasy, ykdysady, ruhy-jemgyýetçilik, ylym-bilim we sport merkezi hökmündäki ornuna has gowy düşünmäge ýardam berýändigi barada bellediler. Toý ruhuna beslenen dabaranyň dowamynda Medeniýet bölüminiň aýdymyçylarynyň ýerine ýetiren aýdymdyr-sazlary, folklor çykyşlary dabara gatnaşyjylara uly ruhubelentilik paýlady. Dabaranyň ahyrynda oňa gatnaşanlar milli ýörelgelerimizi dabaralandyrýan Gahryman Arkadagymyza öz sagbolsunlaryny aýdyp, alkyş sözlerini beýan etdiler.