Türkmenistanyň Belgiýadaky ilçihanasynyň wekilleri Brýussel şäherinde geçirilen “Team Belgium Global Gateway” atly “tegelek stoly” maslahatyna gatnaşdylar. Türkmenistan ilçihanasynyň geňeşçisi Ýagşymyrat Kakajanow öz çykyşynda ýurduň ykdysady mümkinçilikleri, strategik orny we amatly maýa goýum gurşawy barada giňişleýin maglumat berdi.

Türkmen diplomaty, ýurdumyzyň söwda, logistika we senagat ugurlarynda Belgiýa hem-de Ýewropa Bileleşigi bilen hyzmatdaşlygy berkitmäge gyzyklanma bildirýändigini nygtady. Şeýle hem, çykyşynyň esasy temasy Türkmenistan ulag düzümleri boldy. Kakajanowyň bellemegine görä, Türkmenbaşy Halkara deňiz porty Ýewraziýanyň söwda gatnaşyklary üçin möhüm merkez bolup durýar. Uzynlygy 5 müň kilometre ýetýän demir ýol ulgamy, döwrebap terminallar we sanly tehnologiýalaryň ornaşdyrylmagy Belgiýanyň kompaniýalary üçin amatly şertleri döredýär.

Energetika pudagynda Ýewropanyň energetika howpsuzlygyny üpjün etmekde, şeýle hem Gündogar – Günbata gaz geçirijisiniň ähmiýetini artdyrjak Hazarüsti gaz geçirijisiniň geljegi aýratyn üns aldy.

Türkmenistanyň ilçihanasynyň wekilleri senagat we gurluşyk pudaklarynda maýa goýum mümkinçiliklerini hem-de häzirki zaman senagat toplumlaryny ösdürmek baradaky maksatlary Belgiýanyň kompaniýalarynyň wekillerine tanyşdyrdylar. Şeýle hem, ýurduň dag magdan pudagyna ekologiýa taýdan durnukly tehnologiýalary ornaşdyrmak baradaky başlangyçlar belgiýaly kompaniýalaryň ünsüni çekdi.

Zeýnep BAÝRAMSÄHEDOWA,

Berdimuhamet Annaýew adyndaky
Arkadag şäher mugallymçylyk orta
hünär okuw mekdebiniň talyby.