2024–2025-nji okuw ýylynyň tamamlanmagy mynasybetli, Türkmenistanyň ähli orta mekdeplerinde «Soňky jaň» dabarasy ýokary ruhubelentlikde geçirildi. Bu barada Türkmenistanyň resmi metbugaty habar berdi.

Bu möhüm gün ýaş uçurymlar üçin täze durmuşa gadam basmagyň, mekdep ýyllary bilen hoşlaşmagyň tolgundyryjy pursatydyr. Bu baýramyň Aşgabat şäheriniň güni bilen gabat gelmegi hem onuň şowhunyny artdyrdy. Döwletimizde Hormatly Prezidentimiziň ýolbaşçylygynda bilim ulgamyny döwrebaplaşdyrmak boýunça giň gerimli işler alnyp barylýar. Okuw maksatnamalary täzeçil usullaryň esasynda döwrebaplaşdyrylýar, innowasion sanly tehnologiýalar ornaşdyrylýar. Şeýle hem okuw kitaplarynyň mazmuny baýlaşdyrylýar. Munuň özeninde ýaşlaryň bilim derejesiniň dünýä ölçeglerine laýyk bolmagy, geljekki hünärmenleriň döwrebap we giň gözýetimli bolup ýetişmegi üçin mümkinçilikleriň döredilmegi durýar.

Dabara mynasybetli uçurymlar, mugallymlar we bilim işgärleri Garaşsyzlyk binasyna, şeýle-de Berdimuhamet Annaýewiň ýadygärliklerine gül goýdular. Mekdeplerde geçirilen dabaralar Döwlet senasynyň ýaňlanmagy bilen başlanyp, hormatly Prezidentimiziň uçurymlara we bilim işgärlerine iberen Gutlagynyň okalmagy bilen dowam etdi. Gutlagda ýaşlaryň geljegimizi gurujy güýç hökmünde ähmiýeti aýratyn bellenildi.

Dabaralaryň dowamynda baýramçylyk çykyşlary, gutlaglar, uçurymlaryň hoşallyk sözleri ýaňlandy. Tapawutlanan okuwçylara we mugallymlara ýadygärlik sowgatlar gowşuryldy. Soňky jaňyň kakylmagy bilen uçurymlar özlerinden kiçi ýaşly körpelere bilim ýolunyň nyşanyny tabşyrdylar. Ak kepderileriň asmana uçurylmagy baýramçylyk pursatlarynyň iň täsirli sahnalarynyň biri boldy.

Dabara gatnaşyjylar döwlet Baştutanymyzyň ýaşlar we bilim ulgamyna edýän üns-aladasy üçin hoşallyk bildirip, bilim ulgamynyň mundan beýläk-de ösdürilmegine ynam bildirdiler. Şeýle hem uçurymlar üçin muzeýlere, seýilgählere gezelençler, agşam bolsa «Aşgabat» aýdym-saz merkezinde baýramçylyk konserti guraldy.

Güljan SERDAROWA,

Türkmenistanyň Daşary işler ministrliginiň
Halkara gatnaşyklary institutynyň talyby.