Türkmenistanyň Daşary işler ministrliginiň Halkara gatnaşyklary institutynda hereket edýän Ýaş diplomatlaryň mekdebiniň guramagynda geçirilýän «Parahatçylygyň ýaş çaparlary» atly akyl-paýhas bäsleşiginiň III möwsüminiň 4-nji saýlama oýny geçirildi. 

«Beýik Magtymguly Pyragynyň taglymaty – umumadamzat gymmatlyklarynyň milli şamçyragy» atly umumy şygar astynda geçirilýän bu möwsümiň 4-nji oýnuna gatnaşan mekdep okuwçylaryndan Aşgabat şäheriniň ýöriteleşdirilen 16-njy orta mekdebiniň okuwçysy Medine Myratberdiýewa we Balkan welaýatynyň Balkanabat şäheriniň 17-nji orta mekdebiniň okuwçysy Kürmämmet Nobatow dagylar ýeňiş gazandylar.

Bäsleşige Türkmen döwlet maliýe institutynyň uly mugallymy Ahmet Annaberdiýew, Türkmenistanyň Daşary işler ministrliginiň Halkara gatnaşyklary institutynyň uly mugallymy, filosofiýa ylymlarynyň kandidaty Begenç Karaýew, şol institutyň uly mugallymy, filologiýa ylymlarynyň kandidaty Baba Saryýew dagylar emin-agza hökmünde çykyş etdiler.

Türkmenistanyň Telewideniýe, radiogepleşikler we kinematografiýa baradaky döwlet komitetiniň «Miras» teleradioýaýlymy bilen bilelikde Türkmenistanyň Daşary işler ministrliginiň Halkara gatnaşyklary institutynyň okuw studiýasy tarapyndan ýazgy edilen bäsleşige «Miras» teleýaýlymynda ýakyn günlerde tomaşa edip bilersiňiz.

Kadyrmyrat Öwezgylyjow,
Türkmenistanyň Daşary işler ministrliginiň
Halkara gatnaşyklary institutynyň talyby.