Ýurdumyzda tarp ýerleri özleşdirmek, döwrebap tilsimatlar arkaly oba hojalygynyň kämil düzümini emele getirmek, ilaty ekologik taýdan arassa önümler bilen üpjün etmek, bäsdeşlige ukyply ýerli önümlerimiziň eksportynyň gerimini giňeltmek babatda durmuşa geçirilýän işlere Tejen etrabynyň daýhanlarydyr, hususy pudagyň wekilleri hem saldamly goşant goşýar. Tejen etrabynyň daýhanlary hem şu ýylda jemi 2033 gektar meýdana ýazlyk gök we bakja ekinleri ekip, Döwlet tabşyrygyny üstünlikli ýerine ýetirmek maksady bilen häzirki wagtda ýeralma, pomidor, hyýar, sogan, kelem, käşir ýaly görnüşlerine ideg etmek işleri gyzgalaňly alnyp barylýar. Zähmetsöýer daýhanlarymyz bol hasyl ýetişdirmek işinde suw serişdelerinden netijeli we tygşytly peýdalanýarlar. Giň gözýetime uzalyp gidýän ekinleriň hataryny synlanyňda, bur ýerde ene toprakda ýetişdirilýän bol hasylyň kemala getirilendigine göz ýetirýärsiň. Berekedini bolluk bilen eçilen ekerançylyk meýdanlarynda şu günler hasyly ýygnamak işi dowam edýär. Daýhanlar ýygnalýan ekinleri ak bazarlaryň üsti bilen ilata ýetirýärler. Olar geljekde bölünip berlen ýerleri doly özleşdirmegiň hasabyna ekinleriň görnüşlerini we önümleriň möçberini artdyrmaklygy maksat edinýärler. Döwletimiziň daýhanlara berýän goldaw-hemaýatlaryny, ýeňilliklerini her ädimde duýýan etrabyň gök ekerançylarynyň tutanýerli zähmetiniň miweleri saçaklara bereket bolup dolar.