Golaýda, «ProdEkspo 2023» ady bilen Russiýanyň paýtagty Moskwada Halkara azyk önümleri sergisi geçirildi. Gündogar Ýewropa boýunça degişli ugurda iň uly hasaplanylýan bu sergä Türkmenistanyň Senagatçylar we telekeçiler birleşmesiniň agzalary hem gatnaşyp, uly üstünlik gazandylar.

Halkara sergä jemi 35 ýurduň 2 müňden gowrak konditer ugurly kärhanalary öz önümlerini hödürlediler. Şolaryň hatarynda ýurdumyzyň «Altyn Ýunus» hususy kärhanasy we telekeçi Amandursun Begjanowanyň ýolbaşçylyk edýän «Balam» haryt nyşanly konditer kärhanasynyň önümleri uly seslenmä eýe bolup, kärhanalaryň önümçiligi babatda işleşmek üçin şertnamalar baglaşyldy.

«ProdEkspo 2023» halkara sergisiniň çäklerinde geçirilen 30-njy Halkara azyk önümleriniň bäsleşiginiň jemleri boýunça «Altyn Ýunus» kompaniýasynyň «Glory» haryt nyşanly plitka şokoladlary we çagalaryň söýgüli önümi bolan «Well» şekersiz sakgyçlary altyn medallaryň 2-sini eýeledi. «Glory» şokoladlary hususy kärhana tarapyndan geçen ýylyň noýabrynda öndürilip başlandy we onuň süýtli, gara, maňyzly, ýertudana huruşly, çernika tagamly görnüşleri bardyr.

Mundan başga-da, şol bäsleşikde «Balam» haryt nyşanly konditer kärhanasynyň künjüli «Grilýaž», «Ýürek» hem-de şokolad tagamly «Balam», «Ýürek» gatlakly kökeleri, umumylykda, altyn medallaryň 4-sini eýelemegi başardy. Bular diňe bir «Altyn Ýunusdyr», «Balamyň» halkara üstünligi bolman, eýsem, ýurdumyzyň hususy pudagynyň wekilleriniň eksport kuwwatly we ýokary hilli önümleri ýokary depginde öndürýändigini we bu babatda oňyn tejribe toplandygyny görkezýär. 

Mekan DERÝAÝEW,

Türkmen oba hojalyk institutynyň talyby.