Welaýat merkezindäki Milli “Ak bugdaý” muzeýinde “Milli mirasyň gözbaşy” ady bilen sergi-dabara geçirildi. Milli mirasy aýawly saklamak, baýlaşdyrmak we wagyz etmek,  ene-mamalarymyzyň döreden milli gymmatlyklarymyzyň ähmiýetini açyp görkezmek, ýaş nesilleri köpasyrlyk däplerimizi öwretmek hem-de şonuň esasynda terbiýelemek maksady bilen geçirilen sergi-dabara welaýatyň dürli ýerlerinden zenanlar gatnaşdy.

       Welaýat häkimliginiň, Kärdeşler arkalaşyklarynyň welaýat birleşmesiniň, Zenanlar birleşiginiň welaýat bölüminiň hem-de welaýat medeniýet müdirliginiň bilelikde guramagynda geçirilen sergi-dabara gatnaşyjylar medeni mirasymyza degişli bolan keçeden, keçe önümlerinden, keçe ýerine ýetirilýän  gurallardan, şaý-seplerden, keşdelerden, don, çabyt, kürte, keteni, gyňaç ýaly lybaslardan, dutar, gopuz ýaly saz gurallardan guralan sergi bilen tanyşdylar. Çeper elli zenanlar el işlerini ýerine ýetirmek bilen, olaryň ähmiýeti barada ol ýere ýygnanan ýaşlara gürrüň berdiler. Sergi-dabaranyň dowamynda zenanlaryň läle, hüwdi, monjugatdy, ýar-ýar, ýarawjan  ýaly heňleri ýerine ýetirmegi  onuň many-mazmunyny has-da artdyrdy.