Täze — 2026-njy ýyl Mary welaýatynyň ýangyç-energetika toplumynyň işgärleri üçin möhüm önümçilik üstünlikleriniň döwri boldy. Ýylyň ilkinji günlerinde "Türkmengaz" döwlet konserniniň kärhanalary tebigy gazyň täze senagat akymlaryny aldylar, bu bolsa ýurduň gaz pudagynyň durnukly ösýändiginden habar berýär. Bu barada Türkmenistanyň habarlar portaly habar berýär.

“Galkynyş”, Günbatar Şatlyk, Kelleli we beýleki birnäçe gaz ýataklarynda tebigy gazy çykarmagyň netijeliligini ýokarlandyrmak maksady bilen meýilnamalaýyn işler alnyp barylýar. Önümçiligiň hiline gözegçilik etmek hem-de ylmy taýdan goldamak meselelerine aýratyn ähmiýet berilýär. Şunuň bilen baglylykda, barlaghanalar döwrebap tehniki serişdeler bilen üpjün edilýär. Hususan-da, “Marygazçykaryş” müdirligine Ýaponiýada öndürilen ýokary takyklykly täze enjamlar getirildi.

"Galkynyş" ýatagyny özleşdirmegiň birinji tapgyrynyň çäginde çuňlugy 4180 metr bolan täze ulanyş guýusy burawlandy. Netijede, gije-gündizde 2 million kub metrden gowrak tebigy gazyň senagat akymy alyndy.

Şeýle hem Merkezi Garagum gaz toplumynyň Toparjulba ýatagynda oňyn önümçilik netijeleri gazanyldy. Bu ýerde çuňlugy 1200 metr bolan täze guýynyň işe girizilmegi bilen gije-gündizde ortaça 300 müň kub metr kükürtsiz tebigy gaz öndürilýär.

Hünärmenleriň bellemegine görä, şeýle görkezijiler tehnikalaryň täzelenmegi, döwrebap tehnologiýalaryň ornaşdyrylmagy we öňdebaryjy halkara tejribesiniň ulanylmagy netijesinde mümkin boldy. Pudakda Türkmenistanyň Prezidentiniň nebitgaz pudagyny ösdürmek we uglewodorodlary çykarmagy artdyrmak boýunça goýan wezipeleri yzygiderli ýerine ýetirilýär.

2026-njy ýylyň şowly başlanmagy gaz pudagynyň ýurduň ykdysadyýetine goşýan goşandyny tassyklaýar we Türkmenistanyň dünýäniň energetika bazaryndaky ornuny berkitmäge ýardam edýär.

Bibihajar KERIMOWA,

Türkmenistanyň Döwlet energetika
institutynyň mugallymy.