Halkymyzyň toý saçaklaryny hemişe dürli görnüşli konditer önümleri bilen bezemek üçin Mary şäherindäki, Türkmenistanyň Senagatçylar we telekeçiler birleşmesiniň agzasy bolan «Hojaly» hojalyk jemgyýetiniň agzybir işgärleri hem gaýratly zähmet çekýärler. Hojalyk jemgyýetiniň işgärleri 2023-nji — Arkadag Serdarly bagtyýar ýaşlar ýylynyň ilkinji günlerinden «Kilwan» haryt nyşanly, dürli görnüşli konditer önümlerini öndürip başladylar. Kärhanada hamyr ýasaýjy, şekil beriji, bişiriji we gaplaýjy bölümler hereket edip, önümçilik bölümlerinde dünýä belli kompaniýalaryň kuwwatly tehnologiýalary öndürijilikli işledilýär.

Kärhananyň agzybir işgärleri şekerli, huruşly, karamel goşundyly, daşy şokolad örtükli petir kökeleriň hem-de wafliniň birnäçe görnüşini öndürip, halkymyza elýeter bahadan hödürleýärler. Göze gelüwli, owadan gaplara gaplanan, dürli görnüşli, ýokary hilli önümler özüniň tagamy, harytlyk derejesi we ekologik arassalygy bilen tapawutlanýar. Bu ýerde gündelik öndürilýän konditer önümlerine «Wasp», «Kesp», «Has», «Rende», «Altyn däne», «Pasyllar», «Seýrana» ýaly döwrebap atlar berilýär. Arkadagly Serdarymyzyň döredip berýän mümkinçiliklerine jogap edip zähmet çekýän hususy kärhananyň işgärleri täze ýylyň ilkinji aýyny hem uly zähmet üstünlikleri bilen jemlemegi maksat edinýärler.