«Türkmenhaly» döwlet birleşiginiň Balkan welaýatyndaky Gyzylarbat çeper halyçylyk kärhanasynda Berkarar döwletiň täze eýýamynyň Galkynyşy döwrüniň Arkadag Serdarly bagtyýar ýaşlar ýylynyň ýanwar aýynda 190 inedördül metr haly dokamak baradaky meýilnamasy möhletinden bir hepdä golaý öň, iki esseden gowrak berjaý edildi. Şunda gürrüňi edilýän ilkinji aýda taýýarlanylan haly önümleriniň pul hasabyndaky umumy möçberi 436 müň manada golaýlady. Bu görkeziji meýilnamanyň artygy bilen ýerine ýetirilendigini aňlatman, eýsem geçen ýylyň degişli aýy bilen deňeşdirilende, önümçiligiň ösüş depgininiň 120 göterime barabar ýokarlanandygyndan habar berýär. Başgaça aýdylanda, deňeşdirilýän döwürde artyk özleşdirilen işleriň pul hasabyndaky möçberi 73 müň manatlykdan hem köp boldy.

Ýurdumyzyň ugurdaş düzümleriniň arasynda hemişe öň hatarda bolmagy başarýan bu kärhananyň çeper elli gelin-gyzlary 2023-nji ýylyň ilkinji aýyndan gazanan üstünliklerini halal zähmetleri bilen berkitmegi maksat edinip, şu günler has-da gaýratly zähmet çekýärler.