Türkmen bedewiniň milli baýramy mynasybetli

ýurdumyzyň ýokary okuw mekdepleriniň talyplarynyň arasynda

geçiriljek «Bedew — ynsanyň syrdaşy, uçar ganaty» atly

makala ýazmak boýunça döredijilik bäsleşigi

Berkarar döwletiň täze eýýamynyň Galkynyşy döwründe eziz Diýarymyzda atçylyk pudagynda ýetilen sepgitler, Gahryman Arkadagymyzyň eserlerinde ahalteke bedewlerine goýulýan belent sarpa, ahalteke atçylygynyň, seýisçiligiň ylmy esaslary, bu ugurda ýurdumyzyň ylym-bilim ojaklarynda alnyp barylýan ylmy-barlag, okuw işleri, türkmen bedewleriniň gadyr-gymmaty, sungatdaky we edebiýatdaky keşbi professor-mugallymlary hem-de talyp ýaşlary täze döredijilik gözleglerine ruhlandyrýar. «Galkynyş» milli at üstündäki oýunlar toparynyň Halkara parahatçylyk we ynanyşmak ýylynyň 17 — 26-njy ýanwary aralygynda Monako Knýazlygynyň paýtagty Monte-Karloda geçirilen 47-nji halkara sirk sungaty festiwalynda üstünlikli çykyş edip, Altyn baýraga we beýleki ýörite baýraklara mynasyp bolandygy baradaky hoş habar şanly ýylda buýsanjymyzy has-da artdyrdy.

Ahalteke tohum atlarynyň dünýäde medeni atçylygyň döremegindäki we ösdürilmegindäki ähmiýeti uludyr. Hormatly Prezidentimiziň atçylygy ösdürmek, atşynaslaryň täze neslini kemala getirmek boýunça alyp barýan işleri miwesini berýär. Ýurdumyzda atçylygy ösdürmek boýunça işler pudagyň maddy-enjamlaýyn binýadyny yzygiderli berkitmekden başlap, toplumlaýyn alnyp barylýar. Ahalteke bedewleriniň saglygyny goramak, olary talabalaýyk iýmitlendirmek bilen bagly meselelere ylmy esasda çemeleşilýär. Şeýle dünýä nusgalyk işleri wagyz etmek maksady bilen, Türkmen bedewiniň milli baýramy mynasybetli, ýurdumyzyň ýokary okuw mekdepleriniň talyplarynyň arasynda «Bedew — ynsanyň syrdaşy, uçar ganaty» atly makala ýazmak boýunça döredijilik bäsleşigi yglan edilýär.

Bäsleşigiň maksady we wezipeleri:

1. Gahryman Arkadagymyzyň «Ahalteke bedewi — biziň buýsanjymyz we şöhratymyz», «Gadamy batly bedew», «Ganatly bedewler» ýaly ajaýyp kitaplarynyň many-mazmunyny, türkmen bedewleriniň şan-şöhratyny, ýurdumyzda her ýylyň aprel aýynyň soňky ýekşenbesinde bellenilýän Türkmen bedewiniň milli baýramy mynasybetli guralýan dabaralary, «Galkynyş» milli at üstündäki oýunlar toparynyň üstünliklerini wagyz etmek;
2. Berkarar döwletiň täze eýýamynyň Galkynyşy döwründe talyplary watansöýüji, ynsanperwer, ýokary ahlakly, giň dünýägaraýyşly, kämil şahsyýetler edip ýetişdirmek;
3. Ýaşlarda kitaplary, şol sanda  ahalteke bedewleri hakynda eserleri okamaga höwesi artdyrmak hem-de zehinli ýaşlary ýüze çykarmak;
4. Talyplaryň pikirleniş ukybyny, söz baýlygyny we dilewarlygyny ösdürmek.

Bäsleşigiň şertleri:

1. Döredijilik bäsleşigine talyplaryň (her makalanyň 1 awtory bolmaly) öň hiç ýerde çap edilmedik makalalary elektron görnüşde «Bedew — ynsanyň syrdaşy, uçar ganaty» atly makala ýazmak boýunça döredijilik bäsleşigine» diýen ýazgy bilen tohu_hakaton@mail.ru  salgysyna ugradylmaly.
2. Makalalar publisistik žanryň talaplaryna laýyk gelmeli.
3. Döredijilik bäsleşigine gatnaşmaga isleg bildirýän awtor baradaky maglumatlar (bäsleşige gatnaşýan talybyň okaýan ýokary okuw mekdebi, fakulteti, hünäri (taýýarlyk ugry), ýyly, öýjükli ykjam el telefonynyň belgisi) makalanyň ahyrynda doly görkezilmeli.
4. Bäsleşige her ýokary okuw mekdebinden gatnaşyjylaryň sany çäklendirilmeýär.
5. Makalalar 2025-nji ýylyň 10-njy apreline çenli kabul edilýär.
6. Bäsleşigiň netijeleri baradaky maglumatlar Türkmen bedewiniň milli baýramynyň toýlanylýan günlerinde S.A.Nyýazow adyndaky Türkmen oba hojalyk uniwersitetiniň resmi web saýtynda (tohu.edu.tm) ýerleşdiriler.

Döredijilik bäsleşigine hödürlenilýän makalalar aşakdaky şertler esasynda bahalandyrylar:

• Makalanyň mazmunynyň açylyp görkezilişi, maglumatlaryň takyk we aýdyň beýan edilişi;
• Makalanyň diliniň çeperçilik serişdeleriniň dogry hem ýerlikli ulanylyşy;
• Makalanyň tekstiniň grammatik hem-de stilistik taýdan sagdynlygy;
• Makalanyň talybyň okaýan hünäri, taýýarlyk ugry bilen arabaglanyşygy;
• Awtoryň öz şahsy pikirlerini we garaýyşlaryny beýan edip bilşi.

Bäsleşigiň ýeňijilerini sylaglamak:

Bäsleşigiň jemi boýunça Baş baýrak we 1-nji, 2-nji, 3-nji orunlar kesgitlener. Ýeňijilere Hormat hatlary gowşurylar.

Bäsleşige degişli soraglar ýüze çyksa, 34-26-80 belgili telefona jaň edip sorap bilersiňiz.

Çeşme: Türkmenistanyň Bilim ministrligi