Bäherden etrabyndaky «Bäherden» tikin fabriginiň agzybir işçi-hünärmenleri geçen ýyly ýokary görkezijiler bilen jemlediler. Ýurdumyzyň dokma senagatynyň bu baýry kärhanasynda «Halkyň Arkadagly zamanasy» şygary astynda geçen ýylda işleriň aglaba bölegi ýörite sargytlar esasynda ýerine ýetirildi.

Geçen ýylda tikin fabriginde, pul hasabynda alanyňda, 14 million 505 müň manatlyga golaý önüm öndürilip, 2021-nji ýylyň degişli döwri bilen deňeşdirilende, bu babatda 128 göterim ösüş depgini üpjün edildi. Şol döwürde bu ýerde tikin önümleriniň 663 müňden gowragy öndürildi. Şonda ekologik taýdan arassa, ýokary hilli nah matalardan tikilen, ýöriteleşdirilen iş lybaslary, ýorgandyr düşekler, ýassyklar we olaryň örtükleri, şeýle-de beýleki tikin önümleri sargyt edijilere bökdençsiz ugradyldy.

Tikin önümlerine islegiň ýokary bolmagynda fabrikde zähmet çekýän gelin-gyzlaryň her biriniň saldamly goşandy bardyr. Olar Arkadag Serdarly bagtyýar ýaşlar ýylyny hem guwandyryjy görkezijilere beslemek hyjuwy bilen iş gadamlaryny barha batlandyrýarlar.