Aşgabatda Halkara senagatçylar we telekeçiler uniwersitetiniň açylyş dabarasy geçirildi. Çärä türkmen halkynyň Milli Lideri, Halk Maslahatynyň Başlygy Gurbanguly Berdimuhamedow gatnaşdy. Bu barada Türkmenistanyň resmi metbugaty habar berdi.

“Nur bina gurluşyk” hususy kärhanasy tarapyndan bina edilen täze ýokary okuw jaýy 9 gatly baş binadan, 4 okuw binasyndan, 2 sany umumy ýaşaýyş jaýyndan, mejlisler zalyndan, kitaphanadan, naharhanadan, sport desgalaryndan ybaratdyr.

Okuw işi bakalawr we magistr derejelerinde, türkmen we iňlis dillerinde alnyp barlar. Maksatnama teoriýa bilen amalyýeti utgaşdyrýar, ýaşlara telekeçiligiň hukuk-esaslary, sanly tehnologiýalar we döwrebap işewürlik tejribeleri öwrediler.

Uniwersitetde 6 fakultet, 14 kafedra, 42 barlaghana döredilýär. Olaryň arasynda ykdysadyýet, sanly tehnologiýalar, binagärlik-gurluşyk, agrosenagatçylyk, daşary ýurt dilleri hem-de hünär kämilleşdiriş merkezi bar.

Belläp geçsek, Hormatly Prezidentimiz Serdar Berdimuhamedow 2025-nji ýylyň 27-nji iýunynda degişli Permana gol çekipdi. Täze uniwersitet ýurduň ilkinji hususy ýokary okuw jaýy bolup, eksport kuwwatyny artdyrmakda, ykdysadyýeti ösdürmekde we sanlylaşdyrmakda möhüm ähmiýete eýe bolar.

Kakageldi AKMYRADOW,

Türkmenistanyň Daşary işler ministrliginiň
Halkara gatnaşyklary institutynyň talyby.