Ýurduň altyn hazynasy hasaplanýan ýaş neslimiziň ösüşine bolan atalyk aladalarynyň dowamy hökmünde Aşgabatda «Kids Ekspo: Ähli zat çagalar üçin» atly halkara sergi-ýarmarkasy geçirildi.

Bu ýokary derejede gurnalan çärä Türkmenistanyň Bilim ministrligi, Türkmenistanyň Döwlet Gurjak teatry, Türkmenistanyň Dokma senagaty ministrligi, “Mahabat müdirligi”, ÝUNISEF ýaly halkara guramalary, sport federasiýalary, bilim merkezleri we türkmen telekeçileri gatnaşdy. Çäräniň çäginde çagalar we olaryň ene-atalary bilen janly we interaktiw ýagdaýda gatnaşmak üçin ajaýyp şertler döredildi.

«Garagum» myhmanhanasynyň sergi pawilýonynda awgust aýynyň 19-22-si aralygynda geçirilen bu sergi, dürli bilim we dynç alyş çäreleri bilen tanyşmak üçin uly mümkinçilik döretdi.

«Gujurly bilim merkezi» hem okuw merkezinde okaýan diňleýjileriniň ylym-bilim we sport bäsleşiklerinde gazanan üstünliklerini, medallarydyr kuboklaryny hem-de çagalar üçin dürli çeper eser kitaplaryny sergiledi. Sergi zalynyň aýdym-saz meýdançasynda «Gujurly bilim merkeziniň» diňleýjilerinden düzülen sungat toparynyň taýýarlan aýdym-sazly, çeperçilik hem-de sirk sungaty, žonglýorlyk ukyplary bolan ýaşajyk oglan-gyzlarynyň çykyşlary sergä gatnaşanlara we myhmanlara şatlyk goşdy.