Taryhdan häzirki güne çenli türkmen öz milliligi bilen dünýäni haýrana goýup gelýär. Türkmen halylary, gelin-gyzlarymyzyň milli lybaslary, başlaryna daňynýan öýmeleridir çabytlarynyň aňyrsynda, sungat bilen birlikde, uly taryh ýatyr. Gelin-gyzlaryň ýaraşygy bolan owadan öýmeleriň önümçiligi ýurdumyzda giň gerim alýar. Ahal welaýatynyň Ak bugdaý etrabynyň çäginde ýerleşýän Türkmenistanyň Senagatçylar we telekeçiler birleşmesiniň agzasy, telekeçi Öwezdurdy Annameredowa degişli bolan kärhanada öýmeleriň dürli görnüşleri öndürilýär. Hususy kärhanada onlarça işgär zähmet çekýär. Öýmeleriň hoz gülli, saýlan gülli, kädi gülli, ýürek gülli, gurçuk gülli görnüşleri gyz-gelinleriň arasynda geçginli hasaplanylýar.
 — Häzirki wagtda biziň esasy maksadymyz milli egin-eşiklerimizi, esasan hem ene-mamalarymyzdan bize miras galan nepis öýmelerimizi has-da ýokary derejelere çykaryp, kämilleşdirip, gözel gelin-gyzlarymyza olary hödürlemek bolup durýar. Türkmen gelin-gyzlarymyza milli lybaslary, owadan öýmeleri ýokary hilde hödürlemek bilen, biz öz işimizden lezzet alýarys we hemişe-de kämilleşmegiň gözleginde bolýarys — diýip, telekeçi gürrüň berdi.

Gülşat GURBANOWA,
Aşgabat şäher Medeniýet müdirliginiň Merkezleşdirilen kitaphanalar ulgamynyň Büzmeýin DES-indäki I derejeli kitaphanaçysy.