Her ýyl Ylymlar güni mynasybetli Türkmenistanyň Ylymlar akademiýasy we Magtymguly adyndaky Ýaşlar guramasynyň Merkezi geňeşi tarapyndan ylmyň hem-de tehnikanyň ileri tutulýan ugurlary boýunça ýaş alymlaryň arasynda ylmy işler bäsleşigi geçirilýär.

2024-nji ýylda bu bäsleşige 1670 ýaş alym gatnaşdy we olaryň 107-si ýeňiji diýlip yglan edildi. TDH-nyň habar bermegine görä, bu barada 31-nji maýda sanly ulgam arkaly geçirilen Hökümet mejlisinde wise-premýer N.Amannepesow hasabat berdi.

Wise-premýer çykyşynda bäsleşigiň ýeňijilerine gymmat bahaly sowgatlaryň gowşurylmagynyň meýilleşdirilýändigini belledi.

Hormatly Prezidentimiz hasabaty diňläp, ýurdumyzda ylmy taýdan kämil nesilleri terbiýeläp ýetişdirmegiň esasy wezipeleriň biridigini nygtady.

Döwlet Baştutanymyz "Pähim-paýhas ummany Magtymguly Pyragy" ýylynda Türkmenistanyň ýaşlarynyň arasynda alty ugur boýunça ylmy bäsleşigiň geçirilmeginiň möhümdigini belläp, bäsleşigiň ýeňijilerini sylaglamak baradaky teklibi makullady.