Iň gowy kameraly smartfonlaryň sanawy üýtgedi 

«DxOMark» topary «Oppo Find X6 Pro» smartfonynyň kamerasyny gözden geçirdi. Enjamyň mümkinçilikleri olara şeýle bir täsir etdi welin, reýtingde ol birinji ýeri eýeledi. «Oppo Find X6 Pro» esasy 50 megapikselli moduldan, 50 megapikselli telefon kamerasyndan ybarat kamera ulgamy bilen enjamlaşdyrylandyr. Netijede, «Oppo Find X6 Pro» kamerasy 153 bal aldy we kamera telefonlarynyň umumy reýtinginde birinji ýeri eýeledi. Reýtingiň öňki lideri – «Honor Magic5 Pro» - 152 bal alypdy. «Oppo Find X6 Pro» kamerasynyň artykmaçlyklarynyň arasynda hünärmenler suratlara we wideolara pes ýagtylykda, ygtybarly we çalt awtofokusda, ajaýyp effekti we täsirli wideo görnüşi göz öňünde tutdular. 

«Xiaomi» äýnek nauşniklerini çykardy 

«Xiaomi» Smart Audio Glass bilen täze gadjet hödürledi. Smartfona Bluetooth arkaly birigýär we nauşnik hökmünde ulanylyp bilner. Ses äýnegi 360 derejeli daş-töweregi ses effektini döredýän gurluş bilen enjamlaşdyrylandyr. Şeýle hem ses azaltmak funksiýasy we bir wagtyň özünde iki enjama birikmek ukyby bar. Enjam IP54 standartyna görä tozan we çyglylykdan goraýar we agramy bary-ýogy 38.1 gram. Saýlamak üçin çarçuwalaryň bäş görnüşi bar. Ol gepleşik tertibinde ýedi sagat, aýdym diňlemek tertibinde 10 sagat, garyşyk tertipde 22 sagat işläp biler. 

Emeli intellekt adamyň diline düşünip bilermi? 

Emeli intellektiň iň ösen we meşhur dil ulgamlaryndan biri bolan GPT-3, henizem adamlar ýaly dile düşünenok. Muny emeli aň synagyň netijesi bilen subut edýär. GPT-3 henizem adamlardan has «erbet işleýär». Bu emeli intellekt ulgamy, adatça haýsy sözleriň haýsysyna eýerýändigini bellemek bilen dili öwrenýär. Emma GPT-3 sözleriň hersiniň nämäni aňladýandygyny bilmeýär. Ynsanlar öz bedenine eýe bolan biologiki jandar. Dil adamlara işlemäge, aragatnaşykda kömek edýän gural. GPT-3 bolsa indiki sözi çaklaýan emeli programma üpjünçilik ulgamy. Şonuň üçin ol obýektleriň köp häsiýetini kesgitläp bilmeýär. Alymlaryň pikiriçe, emeli intellekt dile adamlaryň düşünşi ýaly düşünmegi üçin üstünde köp işlemegiň zerurdygyny nygtaýar. 

Alymlar howany sowatmagyň ýönekeý usulyny tapdylar 

Angliýanyň Kembrij uniwersitetiniň hünärmenleri yssy howanyň gelmegi bilen has köp ulanylyp başlanýan sowadyjylary (kondisioneri) çalyşmagyň bir usuly barada çykyş etdiler. Munuň ýerine ösümlik esasly örtük (plýonka) ulanmagy maslahat berýärler. Gün şöhlesiniň täsiri astynda bu örtük sowadar. Temperaturanyň peselmegi sebäpli ol daşky ýüzüniň kömegi bilen ýylylygy bölýär. Netijede, materialyň özi daş-töweregindäki howadan birnäçe dereje sowuk bolýar. Elektrik togy hem sarp edilmeýär. Alymlar topary ösümliklerde tapylan sellýuloza nanokristallarynyň ýörite pigment goşmazdan reňkli örtüklere öwrülip biljekdigini anykladylar. Netijede, gün şöhlelerine sezewar bolanda, töwerekdäki howadan ortaça 4,4 dereje sowuk bolýan gök, ýaşyl, gyzyl reňkli örtükleri döretmek mümkin boldy. Mundan başga-da, şeýle örtügiň bir inedördül metri 120 wattdan gowrak sowadyş ukybyny döredýär. Muny bolsa köp sowadyjylaryň güýji bilen deňeşdirip bolar. 

Jübi telefonyny oýlap tapyjy her ýyl täze iPhone satyn alýar 

1973-nji ýylyň 3-nji aprelinde inžener Martin Kuper Motorolanyň laboratoriýasyndan Bell Systems bäsdeşlerine taryhy waka hökmünde ýatda galan ilkinji «jaňy» amala aşyrypdy. Bu adamzat taryhynda ilkinji öýjükli telefon boldy. Çäräniň 50 ýyllygy mynasybetli France24, 94 ýaşyndaky Kuper bilen söhbetdeşlik geçirdi. Kuper öz interwýusynda her bir täze nesliň has akylly bolýandygyny, täze ugra tarap barýandygyny, ähli zadyň barha kämilleşýändigini buýsanç bilen belledi. Häzirki akylly smartfonlary öz agtyklary ýaly ulanmaga hiç wagt ökde bolmajakdygyny aýtdy. Şeýle-de bolsa, her ýyl inžener täze iPhone smartfonyny satyn alýar we her gün «Apple Watch»-i ulanýar. Kuper esasan telefony aragatnaşyk üçin ulanýandygyny hem belläp geçdi. 

Azamat AZADOW,

Türkmenistanyň Inžener-tehniki we 
ulag kommunikasiýalary 
institutynyň talyby.