Janly tebigatyň täsin jandarlarynyň biri suw suguny, onuň beýle atlandyrylmagynyň esasy sebäbi suwuň köp bolan ýerlerinde ýaşaýandygy we şahynyň ýoklugydyr. Onuň daşky keşbi edil beýleki sugunlaryňka meňzeş emma  onuň erkeginiň ýokarky gyýak dişleri agzyndan daşyna çykyp durýar.

Bu täsin jandaryň iň köp duş gelýän ýeri gündogar Hytaý we Koreýadyr. Şeýle-de olaryň göçürilip äkidilip uýgunlaşdyrylan ýurtlary hem bardyr.

    Belläp geçişimiz ýaly bu suw sugunlary kölleriň we derýalaryň kenarlaryndaky, batgalyk ýerlerde, otluk jeňňelliklerde mesgen tutýarlar. Bu täsin jandarlar diňe ösümlikleriň ýapraklary we käbir kömelekler bilen iýmitlenýärler.

    Suw sugunynyň uzynlygy 1 metre çenli ýetýär, agramy 10-15 kilogram töwereginde, boýy bolsa 45-55 santimetrden geçmeýär. Olaryň reňki köplenç, gyzylymtyl-goňras bolup, beden ýüňi gysga, gyş paslynda has ösgün bolýar.

    Olaryň köpelýän döwri dekabr aýyndadyr. Bu jandarlar öz çagasyny 6 aýdan gowrak wagt göwresinde saklaýarlar. Soňra 1-2 kä halatlarda 3 sugun çagasy dogulýar. Olaryň çagasynyň aýaklanmasy üçin bir hepdeden gowrak wagt gerek bolýar.

Arazbagt GYÝTAROWA,
Türkmen oba hojalyk institutynyň
Weterinar lukmançylyk fakultetiniň
I ýyl talyby.